La llingua l'axedrez

Campeón d’Asturies por equipos activu 2010
Oviedo 93.

Grupu “A”

La Universidá d’Uviéu paseose na fase de grupos algamando toles victories posibles, gracies enforma al gran potencial que presentaron, col M.I. David Recuero, y los M.F. Iván González, Iván Andrés y David Roiz, sacándo-yos 9,5 puntos al segundu clasificáu, el CTD Ciudad Naranco, que nun dispusieron de tol so potencial pero supieron aprovechar la so superioridá énte los equipos con menor fuerza, a un pasu quedó’l Grupo 64, que llevó un gran equipu y consiguió vencer al CTD Ciudad Naranco, pero nun aprovecharon los enfrentamientos contra los equipos de la parte baxa, mentanto los llocales del Valdesva terminaron cuartos un bon puestu pa los de Trevías, que siguen puxando pola política de cantera, quintu finalizó l’Atenéu Obreru 1881 que nun tuvieron el día, perbaxu quedó la Universidá d’Uviéu “B” que tuvieron poques opciones frente al restu d’equipos y colista fo’l Candás, l’equipu esti pese a nun contar con un gran potencial ye ún de los equipos de mayor tradición y puxu d’Asturies y el fechu de presentase ya supón tou un triunfu.

Grupu “B”

L’Oviedo 93 ganó’l grupu “B”, algamando toles victories posibles ensin ceder cuasi puntos, 49 de 56, gracies a una bona llabor d’equipu, con grandes actuaciones en caún de los tableros, pertou del M.F. Ignacio Bajo, primer tableru que ganó toles partíes, segundu fo’l R. G. C. C. que con un gran equipu enxamás vio peligrar la so clasificación, terceru en tierra de naide finalizó l’Ensidesa, que llevaron un bon equipu pero con poques opciones énte los clubes punteros del grupu, sufriendo a esgaya nos enfrentamientos con ellos, cuartu acabó l’Al Paso, los de L’Infiestu ficieron un gran campeonatu, partiendo como víctimes y llogrando un puestu de prestixu, quintu terminó’l Torre de Gauzón que ficieron un campeonatu correutu, un puestu perbaxu concluyó l’Oviedo 93 “B”, equipu que llogró imponese a quien debía y a puntu tuvo de superar a rivales mui superiores, séptimu clasificose’l Torre de Gauzón “B” y octavu el CTD Ciudad Naranco “B”, dambos equipos formaos dafechu por guaḥes, poco pudieron consiguir nún grupu tan fuerte.

Clasificaciones

Grupos y fase final: 8 xugadores por equipu.
Grupu “A”: 7 equipos.
Grupu “B”: 8 equipos.
Fase final: eliminatoria y cruce de grupos.
Azul: Campeón y equipos clasificaos.

Fase final, cuadru pol campeonatu

Fase final, restu d’equipos

Grupu “A”

Grupu “A”

Semeya del equipu campeón: Oviedo 93.

Campeón d’Asturies por equipos 2009/2010
Universidá d’Uviéu.

L’Universidá d’Uviéu coronose nuevamente como campeón d’Asturies por equipos, quedando invictos con 73,5 puntos, sacando-y 8,5 puntos al segundu clasificáu y mostrando, otru añu más, la so superioridá nel axedrez asturianu, el Real Grupo de Cultura Covadonga, conxuntu que pese a tar más xustu de fuerces qu’otros años, sumó 65 puntos, meyorando la marca del pasáu añu, firmó un segundu puestu meritoriu, completó’l podium l’Oviedo 93 ( el mio equipu ), faciendo un gran añu con 54,5 puntos, superando a rivales de gran nivel y puntuando abondo énte rivales más débiles, lo qu’otros años suponía una sangría de puntos pa los carbayones.

Los metales nobles repartiéronse ensin nenguna sorpresa, yá que los 3 cabezaleros tamién lo yeren según el ranking Elo al entamu’l campeonatu, siendo motivu de debate si debería camudase’l sistema de competición actual por otru nel que los equipos con menos potencial tuvieren más opciones, sicasí nun paez que vaya a camudase un res, siendo aceptáu por bona parte de la comunidá axedrecística asturiana’l sistema d’anguaño.

Na zona media-alta nun hubo grandes sorpreses, cuartu acabó’l Ciudad Naranco, que fizo un bon añu nel qu’intercalaron imponentes victories como’l 2,5-5,5 énte’l R.G.C.C. o la inesperada derrota frente al Mieres del Camín por 3-5, quintu concluyó’l Grupo 64, la seición del R.G.C.C. entamó’l campeonatu semando dubies a esgaya, pero con un gran final de campaña meyoraron enforma la puntuación del añu pasáu, sestu finalizó l’Ensidesa, que como tolos años fo un equipu seguru, rocosu y ensin altibaxos.

La zona media-baxa tuvo a un cliente non habitual como’l Siero como séptimu clasificáu, l’equipu esti partía como ún de los favoritos al podium, la estratexa de da-yos puxu a los nuevos valores pasó factura, pero de xuru verase recompensada n’años venideros, octavu fo l’Antonio Rico, que fizo una correuta temporada, siendo un recién ascendíu, paez que tan asentándose bien na categoría, pero problemes internos y rumores de fusión col Alfil puen desestabilizar el proyeutu, un puestu penriba’l descensu quedó novenu’l Mieres del Camín, equipu que lluchó con tolo que tenía y enxamás-y perdió la cara a la competición, pese a que llegó a tar a más de 6 puntos de diferencia de los puestos de salvación, la so victoria 1,5-6,5 na xornada cabera énte l’Alfil sirvió pa llograr la permanencia.

El descensu fo pa’l Pablo Morán, décimu, qu’empató a puntos col Mieres del Camín pero un infortuniu fizo que’l desempate quedara peor pa’l conxuntu carbayón, cuando’l so primer tableru nun pudo xugar una partida, siendo asina sancionaos con mediu puntu y col desempate perdíu énte tolos rivales, undécimu acabó l’Alfil, que xunto col colista, El Entrego, rubricaron rápidamente’l so descensu, tando descolgaos del restu d’equipos a mediaos del campeonatu.

2ª división

El Torre de Gauzón consiguió alzase col campeonatu de segunda gracies a un bon añu nel que los castrilloneses cuasi nun perdieron nengún alcuentru, segundu y a mediu puntu namái quedó’l filial del Ciudad Naranco, campeón de filiales, que na xornada cabera venció a los campeones pero’l marxe nun fo suficiente, l’equipu esti al ser un filial nun pue ascender, pero lluchó como los meyores de la categoría, acompangaron al Torre de Gauzón a la máxima categoría l’Atenéu Obreru, terceru, pol que pocos apostaben, pero un final de campeonatu con grandes resultaos fizo que los de Xixón algamaran una categoría que facía tiempu que nun pisaben y cuartu la sorpresa’l campeonatu, el Centro Asturiano de Avilés, qu’en tres años pasó de 4ª a 1ª.

Na zona media, bon añu pa’l filial del Oviedo 93, quintu, que tuvo siempre na zona sele de la clasificación, sestu acabó’l Gradense, equipu qu’aspiraba a ascender y que tendrá que dexalo p’años venideros, séptimu finalizó’l Atenéu Obreru 1881 que fo desinflándose según pasaben les rondes y octavu acabó’l filial del R.G.C.C., que tuvo que lluchar hasta’l final pola so permanencia.

El descensu fo pa’l filial del Universidá d’Uviéu, novenu, que sorprendentemente nun pudo caltener la categoría a pesar del gran nivel del conxuntu y del primer equipu, décimu fo’l filial del Ensidesa, los avilesinos tentaron de salvase hasta’l final, pero l’equipu nun disponía del potencial suficiente, undécimu acabó l’Al Paso, los de L’Infiestu nun entraron nunca na competición y pese a que llucharon con mucha dignidá y algamaron dellos puntos, entá-yos falta un puxu de calidá, colista quedó’l filial del Antonio Rico, puestu del que nun coló en tol campeonatu.

Grupu “A”

El filial del Siero proclamose campeón del Grupu “A” de la 3ª asturiana, l’equipu taba pensáu p’ascender y consiguiolo de manera contundente, averándose al record de la categoría, xunto col equipu sierense subirán los de Cangas del Narcea del San Juan Bautista, qu’algamaron la segunda plaza y retornen a la categoría que más se-yos asemeya por nivel completó’l podium el Centro Asturiano de Gijón, que lluchó hasta’l final, pero un desastrosu resultáu colos campeones impidio-yos l’ascensu.

Na zona media-alta acabaron, cuartu’l filial del Alfil, que fizo un bon añu, quinta la O.N.C.E. que meyoró a esgaya, sestu l’Ensidesa “C” que nun pasó apuros y séptima La Petrina, los de Nava entamaron fuertes pero desinfláronse.

La zona media-baxa ocupáronla, octavu’l filial del Pablo Morán, novenu les promeses del filial del Valdesva, décimu’l filial del Torre de Gauzón y undécimu’l Llanera, equipu que tolos años forma neños a esgaya.

Descendió l’Oviedo 93 “D”, l’equipu formáu por neños nun pudo caltener la categoría pero lluchó con muncha dignidá y enseñaron que la cantera asturiana tien muncho qu’aportar al axedrez.

El Valdesva alzose col campeonatu del Grupu “B” de la tercera asturiana por méritos propios, quedando invictos ensin colar de los puestos de privilexu en tola campaña, acompangará a los de Trevías el filial del Atenéu Obreru, que fizo una campaña mui penriba de lo esperáu, completando los puestos d’honor acabó terceru’l Siero “C”, que tamién consiguió’l títulu de campeón de filiales “C”.

La zona media-alta ocupáronla, cuartu l’Oviedo 93 “C”, que sigue n’escalada y cada añu presenta más nivel, quintu l’Atenéu Obreru de Villaviciosa, que tres el so descensu nun supieron facese bien a la categoría, sestu’l Candás, equipu humilde que cumplía esti añu’l so 25º aniversariu y séptimu’l Ciudad Naranco “C”, los naranquinos siempre presenten alternatives de garantía y mocedá.

La zona media-baxa fo pa, octavu’l filial del Mieres del Camín, novenu’l Torre de Llanes, décimu’l filial del Atenéu Obreru 1881 y undécimu’l filial d’El Entrego.

Descendió l’Alfil “C”, que lluchó por mantenese pero nun fo a llevantar cabeza en tol campeonatu.

4ª división

15 equipos conformaron esti añu la 4ª división asturiana, xugándose con un sistema suizu a 8 rondes, contando les victories como primer desempate.

Nesta edición el campeón fo’l filial del Centro Asturiano de Gijón, empatáu a puntos col filial del Candás, dambos equipos tendrán derechu a xugar en 3ª l’añu que vien.

Clasificaciones

1ª: 8 xugadores por equipu.
2ª: 8 xugadores por equipu.
3ª: “A” y “B” 6 xugadores por equipu.
4ª: 4 xugadores por equipu ( sistema suizu a 8 rondes ).
Azul: Equipos campeones y qu'ascienden.
Roxu: Equipos que descienden.

1ª división

2ª división

3ª división, grupu “A”

3ª división, grupu “B”

4ª división

Semeya del equipu campeón: Universidá d’Uviéu.

Problemes III.

Déxovos dellos problemes d'axedrez, toos ellos ocurrieron en partíes míes, dalgunos vilos, otros non nel molentu, pa los que-yos cueste más daré una pista darréu la imaxe y la solución podrá descubrise pinchando col punteru l'espaciu en blancu.
Cada problema tien un nivel de dificultá ( 1 mínimu - 5 máximu ).

Problema 1

Blanques: David Gallinar Cañedo, Elo: 1.800, Club: Oviedo 93
Prietes: Juan Ramón Goellas, Elo: 0, Club: Torre de Llanes
3/X/2009, Campeonatu d'Asturies por equipos de 3ªB
Xueguen blanques y ganen ( Nivel 4 )

Pista: Les blanques ganen pieza tres llarga combinación.
Solución: 1.g4 Cf4, 2.Af1 f5, 3.Axg7 Dxg7, 4.Dxg7+ Rxg7, 5.e3 fxg4, 6.Ce5 Tc8, 7.Txc8 Axc8, 8.exf4

Problema 2

Blanques: Rafael Fdez. Reyes, Elo: 1.485 FEDA, Club: Siero
Prietes: David Gallinar Cañedo Elo: 1.800, Club: Oviedo 93
24/X/2009, Campeonatu d'Asturies por equipos de 3ªB
Xueguen prietes y ganen ( Nivel 1 )

Pista: Guelpe táuticu de les prietes col que queden superiores.
Solución: 1.Cxf2 Rxf2, 2.Axd3

Problema 3

Blanques: Iván García Sánchez, Elo: 1.742, Club: Candás
Prietes: David Gallinar Cañedo Elo: 1.800, Club: Oviedo 93
14/XI/2009, Campeonatu d'Asturies por equipos de 3ªB
Xueguen prietes y ganen ( Nivel 4 )

Pista: Combinación de pieces qu'iguala y remonta la partida.
Solución: 1.Ac5+ Rh1, 2.Ad5 Db5, 3.Axg2+ Rxg2, 4.Dd5+ Tf3, 5.Te1 d4, 6.Tg1+ Rxg1, 7.Axd4 Rg2, 8.Dxb5

La Partida del IX Open Internacional de Xixón.

Blanques: Javier García Álvarez, Elo: 1.873, Club: Oviedo 93
Prietes: David Gallinar Cañedo, Elo: 1.774, Club: Oviedo 93

Xugaes:
1. f4 c5
2. Cf3 Cc6
3. e3 Cf6
4. c3 d5
5. d4 b6
6. Ad3 g6
7. 0-0 Ag7
8. Cbd2 0-0
9. Ce5 Ab7
10. Cdf3 Cd7?!
11. Cg5 cxd4
12. exd4 a5?!
13. Df3 Cdxe5
14.fxe5 Dc8
15. Dg3 Aa6
16. Tf4? Axd3
17. Dxd3 Cd8
18. Th4 h6
19. Cf3 h5
20. Txh5!? gxh5
21. Cg5 f5
22. exf6 Txf6
23. Dh7+ Rf8
24. Dxh5 Tf5?!
25. Ch7+? Rg8
26. Cg5 Cf7?
27. g4?? Tf6
28. Ch7 Te6
29. Ad3 Te4
30. h3 De6
31. Tf1 Te2
32. g5?? Txd2
33. g6 De3+
34. Rh1 De4+
35. Df3 Dxf3+
36. Txf3 Cd6
37. Te3 Ce4
38. Tf3 Tf2
39. Te3 Txb2
40. c4?! Axd4
41. Tf3 Tf2
42. Td3 Td2
43. Tf3 Cf2+
44. Rg2 Cg4+
45. Rg3 Cf6
46. Cg5 Ae5+
47. Rh4 Tc8?!
48. Ce6 Txc4+
49. Rg5 Tg2+
50. Rf5 Ag3
51. Cd8 Tf2
RINDE. 0-1.

Posición tres la xugada Nu19 de les prietes ( h5 )

1.f4 c5, 2.Cf3 Cc6, 3.e3 Cf6, 4.c3 d5, 5.d4 b6, 6.Ad3 g6, 7.0-0 Ag7, 8.Cbd2 0-0, 9.Ce5 Ab7, 10.Cdf3 Cd7?!

Podría resumise tou con que si perdones, pagues darréu.

Problemes II.

Déxovos dellos problemes d'axedrez, toos ellos ocurrieron en partíes míes, dalgunos vilos, otros non nel molentu, pa los que-yos cueste más daré una pista darréu la imaxe y la solución podrá descubrise pinchando col punteru l'espaciu en blancu.
Cada problema tien un nivel de dificultá ( 1 mínimu - 5 máximu ).

Problema 1

Blanques: David Gallinar Cañedo, Elo: 1.701, Club: Oviedo 93
Prietes: David Canteli Quintero, Elo: 0, Club: Siero
3/I/2009, Open de Navidá de la F.A.P.A.
Xueguen blanques y ganen ( Nivel 3 )

Pista: Les prietes pierden material a esgaya.
Solución: 1.Cxc5 si bxc5 2.Ad5, si Df7, 2. Cxd7 Dxd7, 3.Axc6

Problema 2

Blanques: Iván García Suárez, Elo: 1.707, Club: Candás
Prietes: David Gallinar Cañedo Elo: 1.701, Club: Oviedo 93
4/I/2009, Open de Navidá de la F.A.P.A.
Xueguen prietes y ganen ( Nivel 1 )

Pista: Gánase calidá
Solución: 1.Cf3+ Cxf3, 2.Dxh5

Blanques: Juan Bautista García, Elo: 1.857, Club: Alfil
Prietes: David Gallinar Cañedo Elo: 1.701, Club: Oviedo 93
28/II/2009, Campeonatu d'Asturies de 3ª
Xueguen prietes y ganen ( Nivel 4 )

Pista: Combinacion de pieces contra l'enroque con ventaya decisiva.
Solución: 1.Axc3 bxc3, 2.c4 dxc4 ( Non Axc4 por 3.Cxc4, dxc4, 4.Ce4 De1, 5.Da3+ Rb1, 6.Cxc3 ganando la dama ) 3.Ce4 De1, 4.Cf3 Df1, 5.Da3. Rb1, 6.Cc3+ Ra1, 7.Cxd1

Problema 4

Blanques: Sergio Aído Espina, Elo: 1.671, Club: Universidad
Prietes: David Gallinar Cañedo: Elo: 1.701, Club: Oviedo 93
28/III/2009, Campeonatu d'Asturies de 3ª
Xueguen prietes y ganen ( Nivel 1 )

Pista: Mate en 2.
Solución: 1.Ac4+ c3, 2.De2#

Blanques: David Gallinar Cañedo, Elo: 1.701, Club: Oviedo 93
Prietes: Baldomero Naves Miranda, Elo: 1.823, Club: Valdesva
3/IV/2009, Campeonatu d'Asturies de 3ª
Xueguen blanques y ganen ( Nivel 2 )

Pista: Delles debilidaes prietes irreparables.
Solución: 1.b4 Dc6, 2.c5 Dd8, 3.Cxd4 Axd1, Dxd1 ( 2 alfiles por torre, nun val agora Dxd4 por Axf7+ )

Xuegos deportivos escolares - XXIII Román Torán.

Sub-8.

17 participantes, con 14 neños y 3 neñes de los cuales salió campeón Álvaro López Fueyo, quien yá ganara en marzu'l campeonatu autonómicu sub-8, faciendo un brillante 5 de 5, completaron el podium Jorge Pastrana y Eloy Ordiz, dambos con 4 puntos, la primer neña fo Marta Rueda que quedó 5ª con 3 puntos.
Les partíes teníen un tiempu de xuegu de 30 minutos + 20 segundos por cada xugada.

Clasificación:
http://chess-results.com/tnr22853.aspx?art=1&lan=2&m=-1&wi=1000

Sub-10.

20 xugadores repartíos en 17 neños y 3 neñes, reñíu final de campeonatu y victoria pa Iván Hernanz Iglesias con 4,5 de 5, victoria que pudo ser p'Álvaro Álvarez, 2u clasificáu con 4 puntos, si ésti ganara la so ronda final, na que fizo tables, completó'l podium Juan Villermur colos mesmos puntos.
El tiempu de xuegu fo de 30 minutos + 20 segundos por xugada realizada.

Clasificación:
http://chess-results.com/tnr22852.aspx?art=1&lan=2&m=-1&wi=1000

Sub-12

Clasificación:
http://chess-results.com/tnr23029.aspx?art=1&lan=2&m=-1&wi=1000

Sub-14

Clasificación:
http://chess-results.com/tnr22850.aspx?art=1&rd=5&lan=1&m=-1&wi=1000

Sub-16

Clasificación:
http://chess-results.com/tnr23028.aspx?art=1&lan=1&m=-1&wi=1000

Campeonatu d’Asturies Individual 2009 ( Final ).

1ª división.

Imponente victoria d’Iván González «Tomatillo» que nun dexó opción a nengún rival firmando 8 de 9 puntos posibles ensin derrota, bon campeonatu tamién de Javier Vigil que terminó segundu en solitariu con 6,5 puntos siguíu por Enrique Álvarez «Kikín», ex-campeón, que fizo un tornéu correutu ya Ignacio Bajo, que supo reafirmase tres un entamu dubitativu, pero la gran sensación d’esta edición del campeonatu rexonal fo Jaime Santos Latasa, sub-14, que partía col ranking 26 y s’estrenaba na categoría concluyendo 5u con 5,5 puntos, probe campeonatu de Javier Agüera que partía como claru candidatu al títulu y finalizó 11u con 5 puntos, peor entá fízolo San Claudio, delles vegaes campeón y sub-campeón, qu’acabó un puestu penriba’l descensu 25u con 3,5 puntos y nefastu campeonatu de Pedro Méndez que nun s’estrenó.

Clasificación:
http://chess-results.com/tnr19563.aspx?art=1&rd=9&lan=1&m=-1&wi=1000

Iván González Menéndez.

2ª división.

Campeonatu mui disputáu que finalizó cola sorprendente y merecida victoria de José Ramón Lana con 7 puntos, igualáu pero con meyor desempate qu’Eduardo Fernández Palacio, completen los puestos d’ascensu: Jesús Manuel Álvarez, Marco Antonio Marino y Rodrigo Prieto, otros candidatos como Daniel Canteli, Carlos Suárez o Alexandra Suárez deberán de tentalo l’añu que vien. De los qu’estrenaben la categoría cabe destacar a Javier García que partía como víctima y consiguió 4,5 puntos, firmando la salvación delles rondes previu a finalizar el campeonatu.

Clasificación:
http://chess-results.com/tnr19562.aspx?art=1&rd=9&lan=1&m=-1&wi=1000

José Ramón Lana Prieto.

3ª división.

Enorme igualdá y final d’infartu pa consiguir un puestu d’ascensu, la victoria fo pa Ramiro Díaz Vinjoy con 7,5 puntos, gran campeonatu frutu de la so regularidá, con 7 puntos siguieron Ángel Díaz López y Juan Manuel Pérez, y yá con 6,5 puntos tolos demás ascendíos: 4u Javier Reno, que fizo un gran campeonatu lliderando la tabla bona parte d’él, 5u Fernando Arroyo, mui regular tol tornéu, 6u Miguel Cividanes, que supo ganar cuando más falta-y facía y nun pasó problemes, 7u Pablo Martínez, que partía col primer ranking, 8u Pablo Jesús López que firmó una bona actuación, 9u Pablo González Balbuena, que tres entamar floxu firmó un gran final de campeonatu y les tables sirviéron-y pa subir na ronda final y 10u David Gallinar (yo) estrenándome con ascensu na categoría.

Clasificación:
http://chess-results.com/tnr19564.aspx?art=1&rd=9&lan=1&m=-1&wi=1000

Ramiro Díaz Vinjoy.

4ª división.

Intensa ronda final y victoria pa l’escandinavu Eero Huhtanen que llogró 7,5 puntos, los mesmos que’l 2u clasificáu, José Antonio Enterría, acompanguen a la 3ª división Valentín Pellico Caso que fizo 7 puntos y con 6,5 puntos José Esteban Pérez y Daniel Sánchez, deceicionante campeonatu del ranking 1 Jerzy Mickos Kamiñski que finalizó 24u con 4 puntos.

Clasificación:
http://chess-results.com/tnr19565.aspx?art=1&rd=9&lan=1&m=-1&wi=1000

Jerzy Mickos Kamiñski.

Campeonatu d’Asturies Individual.

1ª división.

Gran nivel xeneral con dellos ex-campeones del campeonatu y mayestros pola F.I.D.E., sicasí paez que’l podium ye enforma favorable a los 3 primeros rankings, los mayestros Iván González «Tomatillo», Javier Agüera y Enrique Álvarez «Kikín», campeón esti últimu de la edición cabera.

Xuntu a ellos, otros destacaos ex-campeones y mayestros como David Roiz, Luís Javier Vigil, Ignacio Bajo o Francisco Javier de San Claudio puen ser les alternatives, pero ensin dubia, la gran sensación del campeonatu ye la promesa de namái 13 años, Jaime Santos Latasa, que yá sabe lo que ye ganar a los grandes del nuesu axedrez.

Tamién hai novedaes como la del primer tableru del Oviedo 93, Arturo José G. Pruneda, que ta volviendo la so meyor versión y Gumersindo Cabero, recuperáu pa l’axedrez, la única muyer ye la W.F.M. Lucía Fidalgo, qu’ensin partir como favorita bien pue dar la sorpresa.

31 xugadores de los que 1 vencerá, 25 afayaranse y 6 despedirán la categoría.

Ignacio Bajo Gutiérrez.

2ª división.

La nueva xeneración ocupa bona parte d’esta categoría, que cuenta cola otra pelra sub-14 asturiana, Carlos Suárez, pa quien munchos güeyarán, favoritos nun hai nengún claru, pero paez que Daniel Canteli tien les opciones más importantes pa imponese.

Otros xugadores destacaos son Alberto Sánchez Vergara «Buah», Alexandra Suárez, Julio Bernal, José Luís Miranda y el cada vez más en forma Javier Redondo.

50 xugadores conformen la categoría de los qu’ascenderán 5, afayaranse los que queden ente’l 6u y el 39u y descenderán los caberos 10.

José Luís Miranda González.

3ª división.

Podría definise la categoría n’una palabra, igualdá, y ye que cualquiera pue ganar o cayer.

Entama como favoritu’l que fuera yá ranking 1u l’añu pasáu, Pablo Martínez,  pero xugadores que parten non mui cabezaleros nel ranking puen ser les alternatives más potentes como Pablo G. Balbuena, 2u nel campeonatu sub-14 d’Asturies o Daniel Martínez Otero, que meyora a diariu como diz la medra de 173 puntos Elo p’abril que consiguió.

Equí un servidor que s’estrena na categoría partiendo col 46u ranking tentará de dexar altu’l llistón.

92 participantes compondrán la categoría de los qu’ascenderán a 2ª los qu’ocupen los 10 primeros puestos, afayaranse na categoría los 69 siguientes, descendiendo a 4ª los qu’acaben perbaxu l’80u puestu.

Pablo González Balbuena.

Nueva categoría que sirve pa que les nueves xeneraciones entamen a formase nesti deporte y pa que los más rezagaos reentamen la so andadura nel mundu esti.

El polacu Jerzy Mickos Kamiñski parte como cabezaleru, pero tendrá gran competencia col so compañeru d’equipu José Israel Tejera y colos guaḥes que van medrando a diariu como Álvaro Álvarez, Juan Villemur y Alberto Villarroya toos ellos sub-10 y David Roiz ( fiyu de Mayestru David Roiz que xuega en 1ª ), nesti casu sub-12.

44 axedrecistes participen nesta categoría de los que’l 10% +1 ascenderán (5), el restu siguirá l’añu que vien na división recién creada.

José Israel Tejera Nava.

La Partida del Open de Navidá de la F.A.P.A. 2008/2009

Posición tres la xugada Nu19 de les blanques ( Th5? )

1.d4 Cf6, 2.c4 e6, 3.Cc3 Ab4, 4.Ag5 h6, 5. Ah4 c5, 6.Cf3 Axc3+, 7.bxc3 g5

Clásica apertura, les blanques opten por xugar de mou estratéxicu a lo que les prietes respuenden cola defensa Nimzo-india, siendo retrucada cola variante Leningrado, 4.Ag5, que pretende contraatacar rápidamente clavando’l caballu, siguiose tou teóricu hasta que les blanques francen la teoría con 6.Cf3, una xugada de desendolcu que a primer vista nun paez mala, pero nun ye la meyor alternativa, suel siguise con d5, lo que fai ganar espaciu a les blanques.

8.Ag3 Ce4, 9.Dc2 Da5, 10.Tc1 Cxg3, 11.hxg3 cxd4, 12.Cxd4 Cc6, 13.Cf3 b6

Paez que tres esta secuencia les prietes tomen la iniciativa, les blanques sufren la debilitación de la so estructura de peones y la pasividá de les sos pieces, les prietes al contrariu, tienen una estructura sólida y les pieces meyor coordinaes, polo que ye previsible que la partida continúe con ataque prietu, podíen igualo les blanques si en llugar de la pasiva 10.Tc1 xugárase 10.d5, a lo que pue siguise con 10...0-0, ganando asina espaciu y lliberando con ello la posición.

14.e3 Ab7, 15.Ae2 Tc8, 16.Db3?! Ce5, 17.Cxg5?! Axg2, 18.Th2 Ab7, 19.Th5? Tc5

La difícil situación blanca desestabilízase, optóse por xugar 16.Db3, lo que nun paez recomendable yá que la dama queda pasiva, pa dominar esa columna ye meyor 16.Tb1, lliberando asina esta pieza que ta mui pasiva, darréu siguióse con un cambéu de peones favorable a les prietes, ya inda entá tuvieron una oportunidá de salvar la calidá, yá que les prietes nun xugaron la más fuerte 19...Cf3+!, ganando direutamente la calidá, queden nuna delicada posición na que cualquier fallu acaba cola defensa.

20.Ch3? Cd3+!, 21.Axd3 Txh5, 22.Af1 Ac6, 23.Cf4 Th1, 24.Rd2 Th2, 25.Re2 Tg8

Cola calidá de más les prietes xueguen a placer, presionando al rei, que tenta de lliberase con movimientos que nun-y darán un res d’efeutividá debíu a l’aición de les 2 torres, la 1ª en h1 y darréu en h2 y la 2ª presionando dende g8, ataque que paez nun tener nenguna igua salvadora.

26.Re1 Df5, 27.Dc2? Dxc2, 28.Txc2 Txg3!, 29.Te2 Tg1, 30.e4?? Thh1 RINDE.

La desesperada situación blanca vien siguía d’errores qu’acaben rápidamente cola partida, tres la perda d’otru peón agora les blanques pierden l’alfil ensin remediu y opten pola rendición.

Campeón d’Asturies por Equipos 2008/2009
Universidá d’Uviéu.

1ª división.

L’Universidá d’Uviéu coronóse como campeón d’Asturies por equipos, yérenlo yá na penúltima xornada al sacá-y al persiguidor, el R.G.C.C., más d’8 puntos, col que s’enfrentaría na xornada cabera, imponiéndose tamién por un cómodu 5,5-2,5.

L’equipu universitariu fo implacable énte tolos sos rivales, sacándo-yos 7 puntos a cuasi tolos conxuntos, inclusive los más potentes como l’Oviedo 93, el Siero o’l CTD Ciudad Naranco, daqué que nun fizo’l R.G.C.C. qu’igualó al Universidá d’Uviéu nel restu d’enfrentamientos pero nun supo dominar y sacar p’alantre les rondes contra estos 3 clubes consiguiendo 4, 4,5 y 4,5 puntos respeutivamente.

Pela zona alta nun hubo sorpreses, 3u’l CTD Ciudad Naranco, que fizo un gran añu ensin Marcos Llaneza, superando la marca del pasáu añu gracies a la so bona llabor de cantera con xugadores como Carlos Suárez y Jaime Santos Latasa, na élite asturiana con namái 12 años, 4u fo’l Siero, un equipu regular y potente que nun tuvo problemes énte equipos inferiores gracies al gran potencial de los sos 3 primeros xugadores, Manuel Quidiello, Luís Javier Vigil y Rafael Arruabarrena y 5u l’Oviedo 93, que tres un entamu preocupante supo remontar bien y tuvo a puntu de consiguir metese nel podium con un gran añu de Jesús Ángel Lobo y Marcelino Vega y gracies tamién a la reincorporación del M.F. Ignacio Bajo y a los xugadores de cantera.

Na zona sele tuvieron 6u l’Ensidesa, que col inagotable M.F. San Claudio al frente, nun pasó apuros y tuvieron un papel destacáu, más perbaxu quedó 7u’l Grupo 64, que notó a esgaya les baxes respeuto a otros años pero supieron imponese a quienes debíen pa nun pasar por problemes finales.

La zona baxa ocupáronla de nuevu 8u’l C.A.O. que pasó por problemes abondos y tuvo a puntu descender, pero gracies a les 2 rondes caberes, nes que presentaron al equipu titular, consiguieron iguar la situación, lo mesmu pue dicise del Mieres del Camín qu’acabó 9u sufriendo, yá que tuvo qu’enfrentase al Siero na xornada cabera, pero presentando tol potencial del que disponíen, consiguieron un agónicu pero pervaliosu 4-4 frente a un equipu punteru.

El descensu esti añu fo pa El Entrego que concluyó 10u, paecía un bon añu, alcontrábense daqué lloñe del descensu a falta 2 xornaes, pero tuvo que medise a Ensidesa y Oviedo 93 darréu, consiguiendo pocos puntos y descendiendo finalmente, l’undécimu puestu ocupólo’l Torre de Gauzón, tola temporada nos puestos de descensu acabaron pasando factura y n’última posición quedó’l Gradense, que poco pudo facer y nes caberes xornaes tuvo incomparecencies.

2ª división.

Gran añu del Antonio Rico y del Pablo Morán, que nun toparon rival y l’añu que vien militarán na máxima categoría asturiana, honor que tamién tendrá l’Alfil, que supo recuperase del mal añu pasáu.

Bon añu pa los filiales del CTD Ciudad Naranco, Oviedo 93 y Universidá d’Uviéu, que nun pasaron problemes pa mantenese, terminando nos puestos altos de la categoría.

Más probe fo l’añu pa l’Atenéu Obreru y l’Atenéu Obreru 1881, que nun arrancaron en tola temporada, acabando na zona baxa a pesar de tener bon potencial.

Descienden el R.G.C.C. «B» que termina un pésimu añu pese a contar con grandes xugadores, el Centro Asturiano de la Habana, que nun supo adautase a la categoría, l’Atenéu Obreru de Villaviciosa, que fizo un probe papel y el Candás, últimu distanciáu como sorpresa negativa.

3ª división.

Grupu «A».

L’Al Paso paseóse pela categoría, firmando l’ascensu a falta delles xornaes pa finalizar, dándo-y descansu a los titulares a falta 4 xornaes y quedando a mediu puntu d’igualar el record de la categoría, acompanga a esti club a 2ª l’Antonio Rico «B» que partía con un gran potencial y demostrólo asina.

La zona alta ocupáronla l’Atenéu Obreru «B» y el Valdesva «B», que firmaron un bon añu.

Los filiales «C» quedaron mui igualaos ente si, Universidá d’Uviéu, Oviedo 93 y CTD Ciudad Naranco nun pasaron apuros y acabaron en posiciones cómodes, lo mesmu que l’Alfil «B».

La zona baxa fo ocupada por La Petrina pero supo aprovechar el so meyor potencial respeuto al restu de colistes.

L’Atenéu Obreru 1881 «B» consiguió in extremis la permanencia al firmar un 5-1 frente al Llanera, al que-y servía consiguir 1,5 puntos pa mantenese, una llástima yá que ficieron un papel mui dignu, desciende tamién l’Atenéu Obreru de Villaviciosa «B» que fizo un añu paupérrimu ensin cuasi puntuar.

Grupu «B».

Un final d’infartu podría dicise que fo lo que vivió esti grupu gracies a la escasa diferencia ente los equipos con aspiraciones d’ascensu, 5 equipos en mediu puntu diferencia, al final la suerte corrió xuntu al Ensidesa «B» y al Centro Asturiano de Avilés, que superaron a unos mui dignos Siero «B», San Juan Bautista y Valdesva.

La zona media ocupáronla’l Pablo Morán «B», El Entrego «B», el Mieres del Camín «B» y el Torre de Gauzón «B», que nun tuvieron un papel mui destacáu esti añu.

La zona baxa fo pa la O.N.C.E. que llibráronse del descensu na xornada cabera gracies a un bon resultáu y al tropiezu del Alfil «C» qu’acompangará al Candás «B» a la 4ª categoría l’añu que vien.

4ª división.

Gran añu del Ensidesa «C» qu’asciende invictu xuntu al Torre de Llanes, que fizo un gran añu, l’Ensidesa «D» que fo la gran sorpresa y el Siero «C» pese a que l’Oviedo 93 «D» terminara 1 puestu penriba pero debíu a una incomparecencia’l desempate favorez a los de Siero. Llaceriosu añu del Grupo 64 «B» que disponía de potencial suficiente pa ser llíder.

La categoría contó con 7 equipos más que l’añu pasáu como’l Torre de Llanes y l’Ochobre, síntoma de bona salú pa l’axedrez asturianu.

Clasificaciones:
1ª: 8 xugadores por equipu.
2ª: 8 xugadores por equipu.
3ª: «A» y «B» 6 xugadores por equipu.
4ª: 4 xugadores por equipu ( sistema suizu a 8 rondes ).
Azul: Equipos campeones y qu’ascienden.
Roxu: Equipos que descienden.

1ª división.

2ª división.

3ª división, Grupu «A».

3ª división, Grupu «B».

4ª división.

Semeya del equipu campeón: Universidá d’Uviéu.