La llingua l'axedrez

El 27 de setiembre entama la temporada 2008 / 2009 nel panorama axedrecísticu asturianu, y failo col so campeonatu por equipos, el más importante xuntu col individual.

L’añu pasáu, el Real Grupo de Cultura Covadonga coronóse como’l campeón d’esti campeonatu, llogrando tamién vencer ún de los sos componentes, el M.F. Enrique Álvarez Fernández «Kikín», l’individual, pero l’equipu ensin rival del añu caberu paez debilitáu tres colar el M.F. Javier Agüera Naredo, llíder del equipu, pa l’Antonio Rico, siendo’l gran fichaxe d’esti club qu’esta temporada milita na 2ª división.

Tou fai pensar que l’Universidá d’Uviéu, segundu l’añu pasáu y nuevu equipu na máxima categoría española, será’l vencedor d’esti añu, yá que l’Elo mediu del club ye de 2.394, mui penriba de los sos persiguidores, el R.G.C.C. con 2.257 y l’Oviedo 93 con 2.165.

Tres los 2 equipos candidatos, hai dellos clubes con aspiraciones de tar arriba na clasificación y otros con ganes ya ilusión por dar la sorpresa.

L’Oviedo 93 parte como aspirante a quedar ente los 3 primeros, tres dalgunos fracasos, unes nueves direutrices xuntu a fichaxes como la reincorporación del M.F. Ignacio Bajo Gutiérrez, convierten a esti club en ún de los más competentes de la categoría, lo mesmu pue pensase del CTD Ciudad Naranco, cantera d’Asturies por escelencia, que sigue forxando grandes xugadores como Jaime Santos Latasa y Carlos Suárez García, dambos de 12 años, contando tamién ente les sos files col M.I. Marcos Llaneza Vega, posiblemente’l meyor xugador asturianu del momentu. Nesti grupu persiguidor pue amestase’l Siero, que vien faciendo bones campañes y parte con xugadores d’altu nivel como’l M.F. Luís Javier Vigil, que marcarán de xuru territoriu.

Dempués, el Grupo 64, el Centro Asturiano de Oviedo y l’Ensidesa, paez que formarán la metá de la clasificación, ensin descartar posibles alegríes o derrumbes.

Pela parte baxa, el Mieres del Camín, el Torre de Gauzón, el Gradense y El Entrego son los candidatos a ocupala pero non poro los que baxen, tienen muncho que dicir esti añu y xugadores d’altu nivel como Samuel Castelao o Iván Díaz tentarán de demostralo.

Clasificación por Elo de los equipos d’Asturies: 1ª División.