La llingua del axedrez
Siente l'axedrez na to llingua nesti requexu la rede.

Xunto a ellos, otros destacaos ex-campeones y mayestros como David Roiz, Luís Javier Vigil, Ignacio Bajo o Francisco Javier de San Claudio puen ser les alternatives, pero ensin dubia, la gran sensación del campeonatu ye la promesa de namái 13 años, Jaime Santos Latasa, que yá sabe lo que ye ganar a los grandes del nuesu axedrez.

Tamién hai novedaes como la del primer tableru del Oviedo 93, Arturo G. Pruneda, que ta recuperando la so meyor versión y Gumersindo Cabero, recuperáu pal axedrez, la única muyer W.F.M., ye Lucía Fidalgo, qu'ensin partir como favorita bien pue dar la sorpresa.

31 xugadores de los que 1 vencerá, 25 afayaranse y 6 despedirán la categoría.

Marcelino Vega Viejo ( semeya d'ajedrezastur ).

2ª división.

La nueva xeneración ocupa bona parte d’esta categoría, que cuenta cola otra pelra sub-13 asturiana, Carlos Suárez, pa quien munchos güeyarán, favoritos nun hai nengún claru, pero paez que Daniel Canteli tien les opciones más importantes pa imponese.

Otros xugadores destacaos son Alberto Sánchez Vergara “Buah”, Alesandra Suárez, Julio Bernal, José Luís Miranda y el cada vez más en forma Javier Redondo.

50 xugadores conformen la categoría de los qu’ascenderán 5, afayaranse los que queden ente’l 6u y el 39u y descenderán los caberos 10.

Daniel Canteli ( semeya d'ajedrezastur ).

3ª división.

Podría definise la categoría n’una pallabra, igualdá, y ye que cualquiera pue ganar o cayer.

Entama como favoritu’l que fuera yá ranking 1u l’añu pasáu, Pablo Martínez,  pero xugadores que parten non mui cabezaleros nel ranking puen ser les alternatives más potentes como Pablo G. Balbuena, 2u nel campeonatu sub-14 d’Asturies o Daniel Martínez Otero, que meyora a diariu como diz el +173 d’Elo p’abril que consiguió.

Equí un servidor que s’estrena na categoría partiendo col 46u ranking tentará de dexar altu’l llistón.

92 participantes compondrán la categoría de los qu’ascenderán a 2ª los qu’ocupen los 10 primeros puestos, afayaranse na categoría los 70 siguientes descendiendo a 4ª los qu’acaben perbaxu l’80u puestu.

Pablo G. Balbuena ( semeya d'ajedrezastur ).

4ª división.

Nueva categoría que sirve pa que les nueves xeneraciones entamen a formase nesti deporte y pa que los más rezagaos reentamen la so andadura nel mundu esti.

44 axedrecistes participen nesta categoría de los que’l 10% +1 ascenderán (5), el restu siguirá l’añu que vien na división recién creada.

L'Universidad de Oviedo coronose como campeón d'Asturies por equipos, yérenlo yá na penúltima xornada al sacá-y al persiguidor R.G.C.C. más d'8 puntos col que s'enfrentaría na xornada cabera, imponiéndose tamién por un cómodu 5,5-2,5.

L'equipu universitariu fo implacable énte tolos sos rivales, sacándo-yos 7 puntos a cuasi tolos conxuntos, inclusive los más potentes como l'Oviedo 93, el Siero o'l Ciudad Naranco, daqué que nun fizo'l R.G.C.C. qu'igualó al Universidad nel restu d'enfrentamientos pero nun supo dominar y sacar palantre les rondes escontra estos 3 clubes consiguiendo 4, 4,5 y 4,5 puntos respeutivamente.

Pela zona alta nun hubo sorpreses, 3u'l Ciudad Naranco que fizo un gran añu ensin Marcos Llaneza, superando la marca del pasáu añu gracies a la so bona llabor de cantera con xugadores como Carlos Suárez y Jaime Santos Latasa, na élite asturiana con namái 12 años, 4u fo'l Siero, un equipu regular y potente que nun tuvo problemes énte equipos inferiores gracies al gran potencial de los 3 primeros xugadores, Manuel Quidiello, Luís Javier Vigil y Rafael Arruabarrena y 5u l'Oviedo93, que tres un entamu preocupante supo remontar bien y tuvo a puntu de consiguir metese nel podium con un gran añu de Jesús Ángel Lobo y Marcelino Vega y gracies tamién a la reincorporación del M.F. Ignacio Bajo y a los xugadores de cantera.

Na zona sele tuvieron 6u l'Ensidesa, que col inagotable M.F. San Claudio al frente, nun pasó apuros y tuvieron un papel destacáu, más perbaxu quedó 7u'l Grupo 64 que notó a esgaya les baxes respeuto a otros años pero supieron imponese a quienes debíen pa nun pasar por problemes finales.

La zona baxa ocupáronla de nuevu 8u'l C.A.O. que pasó por problemes abondos y tuvo a puntu descender, pero gracies a les 2 rondes caberes, nes que presentaron al equipu titular, consiguieron iguar la situación, lo mesmu pue dicise del Mieres del Camino qu'acabó 9u sufriendo yá que tuvo qu'enfrentase al Siero na xornada cabera, pero presentando tol potencial del que disponíen, consiguieron un agónicu pero pervaliosu 4-4 frente a un equipu punteru.

El descensu esti añu fo pal Entrego que concluyó 10u, paecía un bon añu, alcontrábense daqué lloñe del descensu a falta 2 xornaes, pero tuvo que medise a Ensidesa y Oviedo 93 darréu, consiguiendo pocos puntos y descendiendo finalmente, l'undécimu puestu ocupolo'l Torre de Gauzón, tola temporada nos puestos de descensu acabaron pasando factura y n'última posición quedó'l Gradense que poco pudo facer y nes caberes xornaes tuvo incomparecencies.

2ª división

Gran añu del Antonio Rico y del Pablo Morán, que nun toparon rival y l'añu que vien militarán na máxima categoría asturiana, honor que tamién tendrá l'Alfil, que supo recuperase del mal añu pasáu.

Bon añu pa los filiales del Ciudad Naranco, Oviedo 93 y Universidad de Oviedo, que nun pasaron problemes pa mantenese, terminando nos puestos altos de la categoría.

Más probe fo l'añu pal Ateneo Obrero y l'Ateneo Obrero 1881, que nun arrancaron en tola temporada, acabando na zona baxa a pesar de tener bon potencial.

Descienden el R.G.C.C. “B” que termina un pésimu añu pese a contar con grandes xugadores, el C.A. de la Habana que nun supo adautase a la categoría, l'A.O. de Villaviciosa, que fizo un probe papel y el Candás, últimu distanciáu como sorpresa negativa.

3ª división “A”

L'Al Paso paseose pela categoría, firmando l'ascensu a falta delles xornaes pa finalizar, dándo-y descansu a los titulares a falta 4 xornaes y quedando a mediu puntu d'igualar el record de la categoría, acompanga a esti club a 2ª l'Antonio Rico “B” que partía con un gran potencial y demostrolo asina.

La zona alta ocupáronla Ateneo Obrero “B” y Valdesva “B” que firmaron un bon añu.

Los filiales “C” quedaron mui igalaos ente si, Universidad de Oviedo, Oviedo 93 y Ciudad Naranco nun pasaron apuros y acabaron en posiciones cómodes, lo mesmu que l'Alfil “B”.

La zona baxa fo ocupada por La Petrina pero supo aprovechar el so meyor potencial respeuto al restu de colistes.

L'Ateneo Obrero 1881 “B” consiguió in extremis la permanencia al firmar un 5-1 frente al Llanera, al que-y servía consiguir 1,5 puntos pa mantenese, una llástima yá que ficieron un papel mui dignu, desciende tamién l'A.O. de Villaviciosa “B” que fizo un papel paupérrimu ensin cuasi puntuar.

3ª división “B”

Un final d'infartu podría dicise que fo lo que vivió esti grupu gracies a la escasa diferencia ente los equipos con aspiraciones d'ascensu, 5 equipos en mediu puntu diferencia, al final la suerte corrió xunto al Ensidesa “B” y al A.O. de Avilés, que superaron a unos mui dignos Siero “B”, San Juan Bautista y Valdesva.

La zona media ocupáronla'l Pablo Morán “B”, L'Entrego “B”, el Mieres del camino “B” y el Torre de Gauzón “B”, que nun tuvieron un papel mui destacáu esti añu.

La zona baxa fo pa la O.N.C.E. que llibráronse del descensu na xornada cabera gracies a un bon resultáu y al tropiezu del Alfil “C” qu'acompangará al Candás “B” a la 4ª categoría l'añu que vien.

4ª división

Gran añu del Ensidesa “C” qu'asciende invictu xunto al Torre de Llanes que fizo un gran añu, l'Ensidesa “D” que fo la gran sorpresa y el Siero “C” pese a que l'Oviedo 93 “D” terminara 1 puestu penriba pero debíu a una incomparecencia'l desempate favorez a los de Siero. Llaceriosu añu del Grupo 64 “B” que disponía de potencial suficiente pa ser llíder.

Clasificaciones
1ª: 8 xugadores por equipu.
2ª: 8 xugadores por equipu.
3ª: “A” y “B” 6 xugadores por equipu.
4ª: 4 xugadores por equipu ( sistema suizu a 8 rondes ).
Azul: Equipos campeones y qu'ascienden.
Roxu: Equipos que descienden.

2ª división

3ª división “A”

3ª división “B”

4ª división