La llingua del axedrez
Siente l'axedrez na to llingua nesti requexu la rede.

El 27 de setiembre entama la temporada 2008 / 2009 nel panorama axedrecísticu asturianu, y failo col so campeonatu por equipos, el más importante xunto col individual.

L'añu pasáu, el Real Grupo de Cultura Covadonga coronose como'l campeón d'esti campeonatu, llogrando tamién vencer ún de los sos componentes, el M.F. Enrique Álvarez Fernández "Kikín", l'individual, pero l'equipu ensin rival del añu caberu paez debilitáu tres colar el M.F. Javier Agüera Naredo, llíder del equipu, pal Antonio Rico, que fo'l gran fichaxe d'esti club qu'esta temporada milita na 2ª división.

Tou fai pensar que l'Universidad de Oviedo, segundu l'añu pasáu y nuevu equipu na máxima categoría española será'l vencedor d'esti añu, yá que l'Elo mediu del club ye de 2.394, mui penriba de los sos persiguidores, el R.G.C.C. con 2.257 y l'Oviedo 93 con 2.165.

Dempués de falar de los 2 equipos candidatos, hai dellos clubes con aspiraciones de tar arriba na clasificación y otros con ganes ya ilusión por dar la sorpresa.

L'Oviedo 93 parte como aspirante a quedar ente los 3 primeros, tres dalgunos fracasos, el nomamientu de Jesús Ángel Lobo como director deportivu y unes nueves directrices xunto a fichaxes como la reincorporación del M.F. Ignacio Bajo Gutiérrez, convierten a esti club en ún de los más competentes de la categoría, lo mesmu pue pensar el Ciudad Naranco, cantera d'Asturies por escelencia que sigue forxando grandes xugadores como Jaime Santos Latasa y Carlos Suárez García de 12 años y que cuenta ente les sos files col M.I. Marcos Llaneza Vega, posiblemente'l meyor xugador asturianu del momentu. Nesti grupu persiguidor pue amestase'l Siero, que vien faciendo bones campañes y parte con xugadores d'altu nivel como'l M.F. Luís Javier Vigil Álvarez, que marcarán de xuru territoriu.

Dempués, el Grupo 64, el Centro Asturiano de Oviedo y l'Ensidesa, paez que formarán la metá de la clasificación, ensin descartar posibles alegríes o derrumbes.

Pela parte baxa, el Mieres del Camino, el Torre de Gauzón, el Gradense y L'Entrego son los candidatos a ocupala pero non por ende los que baxen, tienen muncho que dicir esti añu y xugadores d'altu nivel como Samuel Castelao Rodríguez o Iván Díaz Fernández tratarán de demostralo.

Clasificación por Elo de los equipos d'Asturies:

1ª División
1. Universidad de Oviedo - 2.394.
2. Real Grupo de Cultura Covadonga - 2.257.
3. Oviedo 93 - 2.165.
4. Siero - 2.159.
5. Ciudad Naranco - 2.153.
6. Grupo 64 - 2.105.
7. Centro Asturiano de Oviedo - 2.093.
8. Ensidesa - 2.081.
9. Mieres del Camino - 2.003.
10. Torre de Gauzón - 1.994.
11. Gradense - 1.988.
12. El Entrego - 1.985.